Pyetje të shpeshta
Përgjigjet për gjërat që pyeten më shpesh. Nëse pyetja jote s'është këtu, na shkruaj në info@advertise.al.
Për bizneset
- Si bëhet një porosi?
- Gjen krijuesin në marketplace, zgjedh një nga shërbimet e tij dhe shkruan brief-in: çfarë promovohet, cili është mesazhi kryesor, çfarë duhet shmangur. Pastaj paguan çmimin e listuar dhe shuma mbahet në garanci nga platforma — jo te krijuesi. Krijuesi njoftohet menjëherë dhe puna fillon sapo ai ta pranojë porosinë.
- Ku rrinë paratë e mia pasi paguaj?
- Te platforma, jo te krijuesi. Shuma mbahet në garanci derisa ti ta aprovosh punën: krijuesi e sheh që porosia është e paguar, por nuk e prek dot. Çdo lëvizje parash shkruhet në një regjistër që nuk fshihet dhe nuk redaktohet kurrë.
- Çfarë ndodh nëse krijuesi nuk e pranon porosinë ose nuk dorëzon?
- Nëse krijuesi e refuzon porosinë, shuma të kthehet e plotë menjëherë. Nëse e pranon por nuk dorëzon në afat, porosia shënohet me vonesë dhe njoftoheni të dy; nëse kalojnë edhe 48 orë të tjera pa dorëzim, porosia rimbursohet automatikisht. Nuk të duhet të kërkosh asgjë — sistemi e mbikëqyr afatin vetë.
- Sa herë mund të kërkoj ndryshime?
- Aq sa deklaron shërbimi që porosite: çdo krijues shënon raundet e korrigjimeve që përfshin, deri në 5. Me çdo kërkesë për ndryshime krijuesi merr një afat të ri dorëzimi. Nëse raundet mbarojnë dhe ende s'jeni marrë vesh, rrugët e mbetura janë aprovimi ose hapja e një mosmarrëveshjeje.
- Sa kohë kam për ta shqyrtuar dorëzimin?
- 5 ditë. Nëse brenda tyre nuk aprovon, nuk kërkon ndryshime dhe nuk hap ankesë, porosia aprovohet vetë dhe pagesa i kalon krijuesit — paratë e një pune të dorëzuar nuk mund të rrinë pafundësisht në garanci. Data e saktë e aprovimit automatik të shfaqet te porosia sapo bëhet dorëzimi.
- A mund ta anuloj një porosi?
- Para pagesës, po — porosia mbyllet dhe s'ka lëvizur asnjë para. Pas pagesës nuk anulohet me një klikim, sepse krijuesi mund ta ketë nisur punën: shuma të kthehet e plotë nëse krijuesi e refuzon porosinë, nëse nuk dorëzon në afat, ose nëse një mosmarrëveshje zgjidhet në favorin tënd. Nëse thjesht ke ndërruar mendje, foli krijuesit në chat — refuzimi nga ana e tij ta kthen shumën të plotë.
Për krijuesit
- Sa më kushton platforma?
- Asgjë fikse: regjistrimi, profili dhe listimi i shërbimeve janë falas. Platforma mban vetëm një komision prej 10% nga porositë e përfunduara, i cili zbritet nga fitimi yt; biznesi paguan gjithmonë saktësisht çmimin që ti liston. Tarifa që vlen për një porosi është ajo e momentit kur krijohet dhe nuk ndryshon më pas.
- Si i marr porositë dhe a duhet t'i pranoj patjetër?
- Kur një biznes paguan një nga shërbimet e tua, njoftohesh me email dhe në platformë. Porosinë mund ta pranosh ose ta refuzosh — asgjë nuk fillon pa vendimin tënd, dhe refuzimi thjesht ia kthen shumën biznesit. Afati i dorëzimit nis vetëm kur e pranon porosinë, jo kur bëhet pagesa.
- Kur dhe si paguhem?
- Sapo biznesi e aprovon dorëzimin, çmimi minus komisionin kalon në portofolin tënd në platformë. Nga aty kërkon tërheqje — nga 25,00 € e lart — me PayPal, transfertë bankare ose para në dorë. Mund të kesh vetëm një kërkesë tërheqjeje të hapur njëherësh; shuma zbritet nga bilanci sapo e dërgon kërkesën dhe kthehet e plotë nëse administrata e refuzon.
- Çfarë ndodh nëse vonohem me dorëzimin?
- Para afatit të vjen një kujtesë. Nëse afati kalon pa dorëzim, porosia shënohet me vonesë dhe njoftoheni të dy; nga ai moment ke edhe 48 orë për të dorëzuar. Nëse kalojnë edhe ato, porosia rimbursohet automatikisht dhe shuma i kthehet biznesit — ndaj, nëse sheh që s'arrin dot, foli biznesit në chat sa më herët.
- Pse më duhet verifikimi dhe si bëhet?
- Pa verifikim profili yt ekziston, por nuk shfaqet në marketplace — bizneset shohin vetëm krijues të kontrolluar. Ngarkon një dokument identiteti dhe, për çdo llogari sociale, një provë pronësie: screenshot i statistikave dhe, sipas rastit, një kod që e vendos përkohësisht te bio-ja. Administrata i shqyrton dhe të njofton; provat i sheh vetëm administrata, kurrë bizneset.
Të përgjithshme
- Çfarë është Advertise?
- Një marketplace që lidh bizneset me influencerë dhe krijues UGC nga Shqipëria dhe Kosova. Bizneset porosisin përmbajtje me çmime publike e të krahasueshme, krijuesit paguhen për punën e tyre, dhe platforma qëndron në mes me pagesë në garanci: paratë i kalojnë krijuesit vetëm kur puna aprovohet.
- Si kryhen pagesat?
- Me kartë ose me aplikacionin POK, përmes POK — procesorit shqiptar të pagesave me të cilin punon platforma. Të gjitha çmimet, komisionet dhe tërheqjet janë në euro. Ne nuk i shohim dhe nuk i ruajmë kurrë të dhënat e kartës sate; shuma nuk i jepet krijuesit derisa puna të aprovohet.
- Çfarë ndodh kur palët nuk merren vesh?
- Secila palë mund të hapë një ankesë te porosia. Paratë qëndrojnë të ngrira në garanci dhe rasti kalon në ndërmjetësim te administrata, e cila shqyrton brief-in, dorëzimet dhe bisedën. Vendimi është një nga tre: rimbursim i plotë për biznesin, pagesë e plotë për krijuesin, ose ndarje e shumës mes të dyve — dhe zbatohet menjëherë në platformë.
- Si ju kontaktoj?
- Për pyetje rreth një porosie konkrete, mënyra më e shpejtë është chat-i brenda porosisë — historiku aty ndihmon edhe në rast mosmarrëveshjeje. Për gjithçka tjetër, na shkruaj në info@advertise.al dhe përgjigjemi brenda një dite pune.